شوبيفاي في مصر

هل شوبيفاي يعمل في مصر؟

أيوه. براندات مصرية كتير بتبيع على شوبيفاي. دي الحاجات اللي بتفرق في مصر، عشان تبقى عارفها قبل ما تبدأ.

آخر تحديث محمود جبريل

العميل بيدفع إزاي؟

فيه طريقتين، ومعظم المتاجر في مصر بتستخدم الاتنين.

  • الدفع عند الاستلام: موجود في شوبيفاي. بتفعّله من إعدادات الدفع، والعميل بيدفع للمندوب.
  • الكارت والمحافظ: Shopify Payments مش متاحة في مصر، فبتربط شركة دفع مصرية. Paymob مثلا بتقول إن الإضافات بتاعتها شغالة مع شوبيفاي.

في خطة Basic، شوبيفاي بياخد 2% زيادة على الأوردرات اللي بتتدفع عن طريق شركة دفع خارجية، غير رسوم الشركة نفسها. أوردرات الدفع عند الاستلام مفيهاش الرسوم دي.

إنت بتدفع اشتراك شوبيفاي إزاي؟

شوبيفاي بيسحب الاشتراك كل شهر بالدولار. استخدم كارت ديبت أو كريدت شغال للدفع أونلاين برا مصر. بعض كروت البنوك في مصر عليها حد للدفع بالعملة الأجنبية، فاسأل البنك الأول.

الاشتراك وأي تطبيقات مدفوعة على أكونتك إنت وباسمك. وشوبيفاي ساعات بيبقى عنده عرض لأول شهور، فشوف السعر النهارده على موقعهم.

ينفع المتجر يبقى بالعربي؟

أيوه. المتجر ممكن يبقى كله بالعربي ومن اليمين للشمال، أو عربي وإنجليزي وفيه زرار لتغيير اللغة. وتطبيق Translate & Adapt من شوبيفاي بيساعد في اللغة التانية.

الشحن جوه مصر

بتحدد سعر شحن لكل محافظة، فالقاهرة والجيزة مثلا ممكن يبقوا أرخص من الصعيد. وشركات شحن كتير في مصر بتتربط بشوبيفاي عن طريق تطبيقات، أو تبعتلهم الأوردرات بنفسك.

البيع بالجنيه المصري

عملة المتجر ممكن تبقى الجنيه المصري، فالعميل يشوف كل الأسعار بالجنيه.

قبل ما تبدأ

جهّز المنتجات والصور والشحن والدفع الأول. كتبت كل اللي محتاجه في دليل تاني.

عايز متجر شوبيفاي للبراند بتاعك؟ ابعتلي على واتساب، أو شوف المتاجر اللي عملتها.